Il svilup rasant da las tecnologias d'infurmaziun e da communicaziun na caracterisescha la societad betg mo en reguard economic, politic e cultural, mabain pli e pli fitg era areguard il mund da viver persunal fin a la concepziun da relaziuns. L'impurtanza da medias digitalas e da tecnologias da computer sco instruments per elavurar, arcunar e transmetter infurmaziuns crescha anc adina, ed ulteriurs svilups èn previsibels. Savens n'èn las tecnologias d'infurmaziun e da communicaziun strusch pli perceptiblas, perquai ch'ellas èn integradas invisiblamain en apparats ed objects zunt differents (p.ex. vehichels, documents d'identitad u bigliets). L'impurtanza creschenta da las tecnologias d'infurmaziun e da communicaziun per la societad e la midada ad ina societad d'infurmaziun han consequenzas per la scola e concernan tala en quatter reguards:
Oz è il mund da viver dals uffants e giuvenils caracterisà da medias tradiziunalas e digitalas sco era d'instruments ed apparats che sa basan sin las tecnologias d'infurmaziun e da communicaziun e che stgaffeschan - tras lur omnipreschientscha - novas pussaivladads d'agir e novas realitads socialas. Ils uffants e giuvenils ston emprender dad ir enturn a moda cumpetenta e cun responsabladad cun questas realitads sco era cun lur consequenzas. Gia avant l'entrada en scola scuntran e nizzegian ils uffants ozendi numerusas medias. In'incumbensa centrala da la scola è quella da surpigliar quest diever da medias avant la scola ed ordaifer la scola sco resursa e champ d'experientscha e da manar las scolaras ed ils scolars ad ina reflexiun pli profunda da questas experientschas ed abilitads. La furmaziun da l'atgna persunalitad e da l'identitad culturala ed era l'acquist da cumpetenzas persunalas e socialas han lieu oz era tras l'occupaziun cun las medias. Ina chapientscha da las basas tecnologicas e dals concepts d'informatica n'è betg mo ina premissa per questa occupaziun, mabain permetta era da chapir svilups futurs e da gidar a concepir tals. Qua tras vegnan ils uffants e giuvenils sustegnids sin la via al savair ir enturn a moda maiorenna cun las medias.
Professiun e studi premettan cumpetenzas en ils secturs medias, informatica ed applicaziun da tecnologias d'infurmaziun e da communicaziun. En la furmaziun professiunala ed en las scolas cuntinuantas da furmaziun generala giogan cumpetenzas en quests secturs ina rolla decisiva. Praticamain mintga professiun premetta oz cumpetenzas en l'applicaziun da tecnologias d'infurmaziun e da communicaziun, cumpetenza da medias e cumpetenzas fundamentalas da l'informatica. La scola populara sto garantir che las scolaras ed ils scolars sappian applitgar ed utilisar a la fin da lur temp da scola obligatoric questas tecnologias a moda raschunaivla ed effizienta en ina scola cuntinuanta u en l'emprendissadi.
Las tecnologias d'infurmaziun e da communicaziun midan noss mintgadi a moda uschè fundamentala, ch'era la furmaziun e la savida èn suttamessas ad ina midada, e quai sur il sectur da medias ed informatica ora. Uschia premetta p.ex. il mund da lavur adina dapli l'abilitad da savair schliar problems cumplexs en cooperaziun cun auters tras l'utilisaziun d'instruments medials, entant che auters process vegnan automatisads pli e pli fitg. La lavina d'infurmaziuns ed il tempo da la midada tecnologica e sociala premettan in'abilitad fundamentala da s'orientar ed in emprender per vita duranta. Talas cumpetenzas ston vegnir sviluppadas gia durant il temp da scola obligatoric. Perquai che l'impurtanza sociala da las tecnologias d'infurmaziun e da communicaziun è creschida, dovri adattaziuns en tut ils roms, era en il senn d'in rinforzament da las cumpetenzas transversalas.
Medias, computers, internet ed apparats pitschens mobils multimedials, sco cameras digitalas e telefonins, porschan potenzials multifars per process d'instruir e d'emprender. Las pretensiuns midadas menziunadas qua survart envers las finamiras generalas da furmaziun pretendan metodas d'instrucziun correspundentas. Latiers tutga era l'integraziun didactica da las novas medias en scola ed instrucziun. Ina scola en il context da la societad d'infurmaziun duai duvrar era sezza ils potenzials da las novas medias confurm a la situaziun ed al stgalim sco instruments d'instruir e d'emprender: per novas furmas da leger e scriver, per la visualisaziun multimediala da fatgs, per activar las scolaras ed ils scolars tar l'exercitar ed experimentar, per la communicaziun e cooperaziun basada sin las medias, per quintar e programmar e per controllar e documentar l'emprendì. La perspectiva interdisciplinara da l'emprender per l'entir plan d'instrucziun sa chatta en spezial en il chapitel Chapientscha da l'emprender e da l'instrucziun.
Las scolaras ed ils scolars s'acquistan ina chapientscha per l'incumbensa ed impurtanza da las medias per ils individis sco era per la societad, l'economia, la politica e la cultura. Els san s'orientar en in mund ch'è caracterisà tras medias e tras tecnologias d'infurmaziun e che sa mida svelt, san nizzegiar a moda independenta, critica e cumpetenta medias ed instruments tradiziunals e novs e san stimar schanzas e ristgas ch'èn colliadas cun quai. Els enconuschan reglas da cumportament e basas giuridicas per in cumportament segir e socialmain responsabel en e cun medias.
Las scolaras ed ils scolars chapeschan concepts fundamentals da l'elavuraziun, arcunaziun e transmissiun automatisada d'infurmaziuns; tranter quels metodas d'organisar, da structurar, d'evaluar e da preschentar datas. Els s'acquistan ina chapientscha fundamentala, co che andaments pon vegnir descrits en ina lingua dal mintgadi, a moda grafica e sin basa da quai era en ina lingua formalisada, ed els emprendan da nizzegiar en differents secturs da la vita strategias da soluziun simplas che sa refereschan a l'informatica. Quai serva a la chapientscha da la societad d'infurmaziun ed abilitescha da sa participar activamain a questa societad.
Las scolaras ed ils scolars s'acquistan ina savida fundamentala davart hardware e software sco era davart raits digitalas. Quai è necessari per savair duvrar in computer a moda cumpetenta. Els s'acquistan cumpetenzas en l'utilisaziun da tecnologias d'infurmaziun e da communicaziun per in emprender ed agir effizient en differents roms e secturs da la vita, tant areguard la scola sco era il mintgadi e la professiun futura.
